د کاپیسا ولایت د حصه اول کوهستان ولسوالۍ ستراتیژیک پلان منظور شو
ښار جوړولو او ځمکو وزارت سرپرست وزیر محترم محمود کرزی د کاپیسا والي او په ملي شورا کې د خلکو له استازو او همدارنګه د وزارت ښاري چارو او ځمکوالۍ چارو مرستیالانو، د کاپیسا ښاروال او د اړوندو ادارو له بېلابېلو مسوولینو سره په ګډه د کاپیسا ولایت د حصه اول کوهستان ولسوالۍ ستراتیژیک پلان منظور کړ.
په هغه مراسمو کې چې په همدې مناسبت د ښار جوړولو او ځمکو په وزارت کې ترسره شوه، ښار جوړولو او ځمکو وزارت سرپرست وزیر د کاپیسا ولایت د حصه اول کوهستان ولسوالۍ ستراتیژيک پلان منظوري یې د یادې ولسوالۍ د منظم انکشاف او ټولګټو پروژو تطبیق لپاره اړین وباله او د دې پلان د ښه تطبیق لپاره اړونده مسوولینو ته لارښوونې وکړې.
د کاپیسا والي او په ملي شورا کې د خلکو استازو د ښار جوړولو او ځمکو وزارت له دې اقدام څخه په مننې زیاته کړه چې د دې پلان په منظورۍ سره سربېره پر دې چې د ټولګټو پروژو د تطبیق لپاره لاره هواره شي د خلکو پر ټولنیز او اقتصادي ژوند کې به پام وړ بدلون رامنځته شي.
په تېر یو میاشت کې ۱۶ پراختیايي پلانونو د ښار جوړولو او ځمکو وزارت د مشرتابه له لوري منظور شوي چې په دې کې ۵ تفصیلي پلانونه، ۴ استراتژیک پلانونه، ۲ منطقوي پلانونه او ۵ د بهسازۍ پلانونه شامل دي چې د دې پلانونو په تطبیق سره به نږدې ۱۵ زره کسانو ته د استوګنې زمینه برابره او د مختلفو ولایتونو په مرکز او ولسوالیو کې د منظم انکشاف سربېره په غیر رسمي سیمو کې د بهسازۍ پروژې تطبیق او د دې سیمو خلکو ته ښاري خدمات وړاندې شي.
###
