د لوګر په څرخ ولسوالۍ کې د ښوونکو ښارګوټي د سړکونو پلان لاسلیک شو
۱۴۴۸/۴/۱۸
د کور او ښار جوړولو وزارت محترم وزیر الحاج مولوي نجیبالله حیات حقاني د لوګر ولایت د څرخ ولسوالۍ اړوند د ښوونکو ښارګوټي د سړکونو پلان لاسلیک کړ.
یاد سړکونو پلان په ۳۸۵ جریبه ځمکه کې د ښوونکو ښارګوټي د منظمې پراختیا او د ترانسپورتي اسانتیاوو د برابرولو په موخه ترتیب شوی، چې له مخې یې درې ډوله سړکونه په پام کې نیول شوي دي.
د پلان له مخې، د ښارګوټي د سړکونو شبکه په درېیو کچو کې طرحه شوې، چې د ۲۰ مترو پلنوالي سړکونه ۴۶۵۰ متره، د ۱۵ مترو پلنوالي سړکونه ۴۶۷۴ متره او د ۱۲ مترو پلنوالي سړکونه ۲۶۴۱ متره اوږدوالی لري.
د یاد پلان له مخې به د ښوونکو ښارګوټي د سړکونو شبکه په منظم ډول رامنځته او د ښارګوټي د راتلونکې پراختیا، د تګ راتګ د اسانتیا او د ښاري نظم لپاره به لازم تخنیکي بنسټ برابر شي.
