د ساختماني پروژو د تسلیمۍ پروسه و ارزول شوه
۱۴۴۳/۰۹/۱۳
د ښار جوړولو او ځمکو وزارت سرپرست محترم مولوي حمد الله نعماني په خپل کاري دفتر کې د ساختماني پروژو اړوندو مسؤلینو او د وزارت له کارکوونکو سره وکتل او د پراختیایي پروژو د تامیناتو پیسو او د پروژو د تسلیمۍ پروسه یې وارزوله.
لومړی د وزارت اړوند مسؤلینو د تسلیم شوو پروژو، تر کار لاندې پروژو، او تسلیمۍ ته چموتو پروژو په اړه معلومات ورکړل او په دغه برخه کې د شته ستونزو په اړه یې یادونې وکړې.
د ښار جوړولو او ځمکو وزارت سرپرست ښاغلي مولوي حمد الله نعماني د ټولو هغه پروژو د برخلیک معلومولو په اړه خبرې وکړې چې په تېر حکومت کې پیل شوې او زیاته کړه چې په اړه دې له د ملي پراختیا شرکت سره دې ستونزې شریکې او د یوې طرحې له جوړولو وروسته دې عملي اقدامات وکړي.
مولوي نعماني ټینګار وکړ چې د تامیناتو او تضمیناتو د ورکړې پروسه دې چټکه شي او له داسې لارو چارو دې کار واخیستل شي چې نه امارت او نه عام خلک زیانمن شي.
