د زابل په شملزو ولسوالۍ کې د ګمرکي تاسیساتو جوړېدل
۱۴۴۳/۱۰/۲۰
د ښار جوړولو او ځمکو وزارت محترم سرپرست مولوي حمدالله نعماني د زابل ولایت له ګڼ شمېر قومي مشرانو او سپین ږیرو سره وکتل او په شملزو ولسوالۍ کې یې د ګمرکي تاسیساتو په اړه خبرې وکړې.
ښاغلي مولوي حمدالله نعماني زیاته کړه چې د مالیې، سوداګرۍ او صنعت، کورنیو چارو او بهرنیو چارو محترمو وزارتونو او د ایسا محترمې ادارې سره په ګډه د اسلامي امارت د رهبرۍ لخوا ورته دنده سپارل شوې چې د شملزو ولسوالۍ کې د ګمرکي تاسیساتو لومړني کارونه بشپړ کړي او په وینا یې چې د دغې پروژې د پلې کولوې په موخه (۲۰) میلیونه افغانۍ ځانګړې شوې دي.
د غونډې ګډونوال د زابل په شملزو ولسوالۍ کې د سوداګریزې بیخ بنا جوړولو په موخه د امارت د نورو ادارو ترڅنګ د ښار جوړولو او ځمکو وزارت له رهبرۍ مننه وکړه او دا یې چاره یې نیک اقدام وباله.
دغه راز له زابل ولایت راغلو مشرانو د ښار جوړولو او ځمکو وزارت څخه د ښاري پراختیا برخه کې د لا زیاتې همکارۍ غوښتنه وکړه.
د خلکو د وړاندیزونو او خبرو اورېدو وروسته د ښار جوړولو او ځمکو وزارت محترم سرپرست مولوي حمدالله نعماني وویل، د زابل ولایت ته یې پاملرنه شته او هڅه کوي چې د نورو ولایتونو ترڅنګ یې ښاري پراختیا او د ټولګټو پروژو پلې کولو برخه کې ښاري وضعیت لا غوره کړي.
