بلخ کې د خواجه ابو نصر پارسا تاریخي جومات د بیارغونې او پراختیايي پروژو له بهیر څخه ګډ نظارت ترسره شو
۱۴۴۷/۱۲/۰۷
د بلخ ولایت په بلخ ولسوالی کې د خواجه ابو نصر پارسا تاریخي جومات د بیارغونې او پراختیايي پروژو له روانو چارو څخه د یوې ګډې نظارتي ډلې له لوري ساحوي څارنه ترسره شوه.
دغه ګډ هیئت د بلخ ولایت محترم مقام، د کور او ښار جوړولو محترم ریاست، د مزارشریف محترمه ښاروالۍ، د ارشاد، حج او اوقافو محترم ریاست، د اطلاعاتو او کلتور محترم ریاست او د بلخ ولسوالۍ د ښاروالۍ د استازو په ګډون جوړ شوی و، چې د پروژې له مختلفو برخو یې له نږدې لیدنه وکړه.
د څارنې پر مهال د مسجد شریف د ترمیم او بیا رغونې، د مدرسې د ودانۍ، د اودسو د ځای او د جومات لوېدیځ لوري ته د سړک جوړولو له چارو څخه ارزونه وشوه او د کار د کیفیت، تخنیکي معیارونو او د منظور شوو پلانونو پر تطبیق ټینګار وشو.
د هیئت غړو د پروژو له پرمختګ څخه د خوښۍ ترڅنګ سپارښتنه وکړه چې د کار کیفیت، شفافیت او د تاریخي او فرهنګي ارزښتونو ساتنه دې په جدي ډول رعایت شي.
په پای کې د ګډ هیئت له لوري د یادو پروژو د دوامداره نظارت او ملاتړ ژمنه وشوه، او دا چارې یې د سیمې د فرهنګي میراث د ساتنې او د عامه اسانتیاوو د ښه والي لپاره مهمې وبللې.
