د کور او ښار جوړولو وزارت محترم وزیر الحاج مولوي نجیب الله حیات حقاني، غزني ولایت ته سفر وکړ او هلته یې پر راستانه شوو مهاجرو کورنیو د دایمي مېشتېدو په پار استوګنیزې نمرې ووېشلې
۱۴۴۷/۹/۲۳
د کور او ښار جوړولو وزارت محترم وزیر الحاج مولوي نجیب الله حیات حقاني، غزني ولایت ته سفر وکړ او پر راستنو شوو مهاجرو کورنیو یې د دایمي مېشتېدنې په پار استوګنیزې نمرې ووېشلې.
محترم وزیر الحاج مولوي نجیب الله حیات حقاني وویل، د اسلامي امارت له اساسي پالیسیو څخه یوه دا ده، چې راستنېدونکو مهاجرینو ته خوندي او باعزته ژوند برابر شي.
ښاغلي وزیر ټینګار وکړ، چې د استوګنیزو ښارګوټو جوړول به د هغو افغانانو لپاره دایمي حل وي چې له کلونو مهاجرت وروسته خپل هېواد ته راستانه کېږي.
د نوموړي په خبره، د کور او ښار جوړولو وزارت هڅه کوي چې د اسلامي امارت په خپله داخلي بودیجه او امکاناتو، راستنېدونکو کورنیو لپاره د استوګنې ترڅنګ د ژوند نور بنسټیز خدمات لکه سړکونه، د اوبو رسولو سیستم، برېښنا او عامه تاسیسات هم برابر کړي، څو هغوی وکولای شي په ارامه او خوندي چاپېریال کې خپل عادي ژوند پیل کړي.
د ښاغلي وزیر الحاج مولوي نجیب الله حیات حقاني له لوري په غزني ولایت کې، د مهاجرینو په لومړي ښارګوټي کې د تفصیلي پلان تر منظورېدو وروسته د نمرو د وېش لړۍ رسماً پیل کړه.
دغه ښارګوټی په یو زر، نهه سوه او اووه (۱۹۰۷) جریبه ځمکه کې جوړ شوی او ټولې شاوخوا اتلس سوه (۱۸۰۰) استوګنیزې نمرې لري، چې پر راستانه شوو مهاجرو کورنیو به ووېشل شي.
د اوس لپاره په دغه لړ کې لسو کورنیو ته نمرې ووېشل شوې او دا لړۍ به دوام پیدا کړي، ترڅو په غزني کې راستنې شوې ټولې مهاجرې کورنۍ له استوګنیزو نمرو برخمنې شي.
د دغو ښارګوټو جوړېدل به د راستنېدونکو مهاجرینو د منظم مېشتېدو ترڅنګ د هغوی لپاره د مناسب استوګنځای، خدماتو او بنسټیزو اسانتیاوو د برابرولو په برخه کې مهم ګام وي.
