په نوي کابل ښار کې د ابادۍ او پرمختګ په پار بل مهم ګام هم پورته شو
۱۴۴۷/۹/۲۳
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې، په نوي کابل ښار کې د پراختیا ورکوونکو شرکتونو له مسؤلینو سره تر لیده کاته وروسته، په دغه ښار کې ورځ بلې ته د پرمختګ او ابادۍ چارې پیلېږي او زیاتېږي.
وروسته له هغې چې د کور او ښار جوړولو وزارت له لوري د کابل – بګرام عمومي سړک د جوړولو چارې رسماً پیل شوې، یو شمېر پراختیا ورکوونکو شرکتونو هم د خپل مسؤلیت له مخې چارې پیل کړې.
تازه؛ د نوي کابل ښار لومړي فاز په (۲.۸) پارسل کې د (بابا قشقار) په نوم سړک د جوړولو چارې د خاور ساختماني شرکت له لوري پیل شوې.
دغه سړک چې پلنوالی یې اتلس (۱۸) متره دی او د اوس لپاره د خاور ساختماني شرکت له لوري د څه باندې دوه کیلو مټره په اوږدوالي په اساسي شکل جوړېږي.
دمګړۍ د دغه مهم سړک چارې په لومړنیو پړاونو کې دي او کار پرې په چټکتیا سره روان دی.
نوی کابل ښار د پراختیا له مهمو پروژو څخه ګڼل کېږي، چې موخه یې د منظم او عصري ښار رامنځته کول، د نفوسو د ګڼې ګوڼې ستونزې حل کول او خلکو ته د ښه ژوند چاپېریال برابرول دي.
د همدې سترې پروژې په چوکاټ کې د سړکونو، استوګنیزو بلاکونو، عامه تاسیساتو او نورو زیربناوو جوړول په تدریجي ډول مخته وړل کېږي.
د بابا قشقار سړک د لومړي فاز په مهمو سړکونو کې شمېرل کېږي، ځکه چې دا به د سیمې د پارسلونو ترمنځ د تګ راتګ اساسي لاره وي او راتلونکو استوګنیزو او خدماتي پروژو ته به د لاسرسي زمینه برابره کړي.
