د مرکز او ولایتونو د پروژو لومړنۍ ارزونې او مشخصاتو لست بشپړ شو
۱۴۴۷/۰۵/۲۸
د کور او ښار جوړولو وزارت د مسکن، ودانیزو چارو او د برنامو د پراختیا د معینیت د سنجش او ارزونې ریاست خبر ورکوي چې د مرکز او ولایتونو په کچه د امارتي او خصوصي پروژو د ابتدايي ارزونې او مشخصاتو لست بشپړ شوی دی.
د یاد ریاست د راپور له مخې، ترسره شوي فعالیتونه د ګڼو مهمو دیني، استوګنیزو، اداري او سوداګریزو پروژو د ابتدايي ارزونې په ترتیب او ثبتولو پورې اړه لري، چې په دې کې د امر بالمعروف او نهی عن المنکر د محتسبینو د حوزې تعمیرات، استوګنیزې او سوداګریزې ودانۍ، جوماتونه، د فقید امیرالمؤمنین مقبره او دارالحفاظ، ابتدایي محکمې، ګدامونه او پارکینګونه، احاطوي دیوالونه، د اوبو ذخیرې، پلې لارې او نورې اړوندې پروژې شاملې دي.
یاد ریاست د تازه جوړو شوو پروژو ترڅنګ، د بیا رغونې پروژو د ابتدايي ارزونې او مشخصاتو لست هم د انجینري او تخنیکي نقشو پر اساس بشپړ کړی دي، د ابتدايي ارزونې لست ترتیبولو ترڅنګ، د غیرمنقول جایدادونو قیمت ټاکنه، د ودانیو څارنه او د پروژو راپور ورکول هم ترسره کېږي.
د ریاست د توضیحاتو له مخې، د ابتدايي ارزونې کار د انجینري نقشو پر اساس د رغونې او ودانیزو چارو د پلان جوړولو لپاره ترسره کېږي، او د عادي ترمیمي کارونو په اړه یې فعالیتونه د غوښتونکې ادارو د وړاندیز او د اړوند ریاستونو په همغږۍ ترسره کېږي.
