د غزني ښار استراتیژیک، اصلاحی، تعدیلي او انکشافي پلان ښاروالۍ ته وسپارل شو
۱۴۴۷/۲/۲۰
د غزني ښار استراتیژیک، اصلاحی، تعدیلي او انکشافي پلان، چې د کور او ښار جوړولو وزارت له لوري طرح، ترتیب او نهایي شوی و، د تطبیق لپاره د غزني ولایت ښاروالۍ ته وسپارل شو.
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، یاد پلانونه د یوې ځانګړې غونډې په ترڅ کې چې په کې د غزني ولایت محترم مرستیال حافظ عبدالرشید عمري، محترم ښاروال مولوي محمد نبي حمزه او اړوندو ادارو استازو ګډون درلود د ښاروالۍ محترمو استازو ته وسپارل شول.
د نوموړي په خبره، په دغه مراسمو کې، محترم حافظ عبدالرشید عمري د یادو پلانونو پر ارزښت، د غزني ښار په پرمختګ کې د هغوی پر اهمیت او د منظم ښاري پراختیا لپاره پر ګډو هڅو ټینګار وکړ.
همداراز، محترم مولوي بلال متقي څرګنده کړه چې دا پلانونه د وزارت د انجنیرانو او متخصصینو له لوري د تخنیکي ارزونو او ګډ کار له مخې ترتیب شوي، او دا د غزني ښار د پرمختګ لپاره یو مهم اقدام ګڼل کېږي.
محترم مولوي محمد نبي حمزه د غزني ښاروال، هم د دغو پلانونو له سپارلو څخه هرکلی وکړ او ډاډ یې ورکړ چې د ښار د انکشافي پلان له مخې به جدي هڅې وکړي.
په دې مراسمو کې د یادو پلانونو تخنیکي او تخصصي توضیحات د تخنیکي ټیم لخوا د یوې پریزنټیشن له لارې وړاندې کړل شول.
د کور او ښار جوړولو وزارت ښاري پلانونه په معیاري بڼه ترتیب او چمتو کوي او د تطبیق لپاره اړوندو ښاروالیو ته سپاري، همدارنګه د تطبیق بهیر ته په جدي توګه څارنه کوي.
