د ښار جوړولو او ځمکو وزارت د تخنیکي بورډ درېیمه ناسته وشوه
۱۴۴۴/۰۱/۰۴
د تخنیکي بورډ درېیمه ناسته د ښار جوړولو او ځمکو محترم سرپرست وزیر مولوي حمدالله نعماني، محترم مالي او اداري مرستیال حافظ محمد امین فاروقي او د دې وزارت رئیسانو او مسولینو په شتون کې جوړه شوه.
په دې ناسته کې په هغه شپږ سوه 600)) جریبه ځمکه بحث وشو چې په شپږ ولایتونو کې د هلمند نوشیروان شرکت لخوا یې غوښتنه شوې او په کې د بېلا بېلو ساختماني او تزئیني ډبرو لکه ګرانیت، مرمر، سرامیک او کاشي د پروسس او تولید فعالیت کوي.
په یاده ناسته کې د ننګرهار ولایت په هغه 60 بلاکه مکروریانونو هم خبرې وشوې چې کار یې په تیر حکومت کې د بېلا بېلو ساختماني شرکتونو لخوا پیل شوی و.
د وزارت اړوند مسؤلینو د یادې پروژې د تخنیکي او حقوقي ستونزو په اړه د اسنادو په شتون کې د ښار جوړولو او ځمکو سرپرست وزیر ته بشپړ معلومات وړاندې کړل.
دغه راز په یاده ناسته کې د ښار جوړولو او ځمکو وزارت اړوند د مرکز او ولایتونو د پروژو او ښارګوټو په اړه هم هر اړخیزې خبرې وشوې.
د ښار جوړولو او ځمکو محترم سرپرست وزیر د دې وزارت د فعالیتونو د لا ښه والي په موخه مسولینو ته لازمې لارښونې وکړې او دغه راز یې د هلمند نوشیروان شرکت د ځمکې غوښتنې په اړه یادونه وکړه، چې دوی د ماسټر پلان په داخل او صنعتي پارکونو کې د یاد شرکت د فعالیت لپاره ګنایش نشته او ښه به دا وي چې نوموړی شرکت په ادې اړه د کرنې او مالدارۍ محترم وزارت او سوداګرۍ محترم وزارت څخه غوښتنه وکړي.
د یادې ناستې په دوام د ښار جوړولو او ځمکو محترم وزیر مولوي حمدالله نعماني یوې تخنیکي کمېټې ته دنده وسپارله چې د ننګرهار (۶۰) بلاکه مکروریانو په اړه ټول اسناد او مدارک وګوري، حقوقي او تخنیکي اړخونه یې وڅېړي او د کره معلوماتو ترلاسه کولو وروسته به یې په تړاو لازم تصمیم ونیسي.
