پروان ولایت کې (۵) جریبه ځمکه له غاصبینو راوګرځول شوه
۱۴۴۳/۱۰/۲۰
د پروان ولایت د ښار جوړولو او ځمکو ریاست په دغه ولایت کې هغه (۵) جریبه ځمکه له غصب راوګرځوله چې یو هېوادوال ته په اجاره ورکړل شوې وه.
یاده ځمکه لومړی یو هېوادوال ته په اجاره ورکړل شوې وه، چې بیا ځینو غاصبینو غصب کړې وه، خو د پروان ولایت د ښار جوړولو او ځمکو ریاست په هڅو له غصب وژغورل شوه او بېرته مستأجر ته وسپارل شوه.
د یادونې وړ ده چې یاده ځمکه د پروان ولایت د مرکز اړوند په (اغېل) کلي کې موقعیت درلود.
دغه راز د یاد ولایت د ښار جوړولو او ځمکو ریاست په پروان ولایت مرکز او ولسوالیو کې د غاصبینو لېست ترتیب کړی او د یاد ولایت د والي دفتر ته یې استولی چې ډېر ژر به عدلي او قضايي ارګانونو ته وسپارل شي.
د ښار جوړولو او ځمکو وزارت ژمن دی چې غصب شوې ځمکې به بېرته له غاصبینو راګرځوي او د ټول هېواد په کچه به د ځمکو له غصب مخنیوی کوي.
