د شهید منصور ښارګوټي د پاکو اوبو او روغتیايي خدمتونو ستونزې وڅېړل شوې
۱۴۴۸/۵/۹
د ننګرهار ولایت د کور او ښار جوړولو ریاست په مشرۍ ګډ کمېسیون د بهسودو ولسوالۍ اړوند د شهید منصور ښارګوټي څخه لیدنه وکړه او د پاکو اوبو او لومړنیو روغتیايي خدمتونو ستونزې یې وڅېړلې.
د ننګرهار ولایت د کور او ښار جوړولو ریاست محترم رئیس انجنیر احمدالله زاهد په مشرۍ په دې لیدنه کې د کلیو د بیارغونې ریاست محترم رئیس مولوي قسمتالله مبارز، د ختیځ زون د ښاري اوبو رسولو او فاضلاب ریاست محترم رئیس مولوي یارمحمد محمدي او د ننګرهار ښاروالۍ د عوایدو محترم رئیس مفتون صاحب هم ګډون درلود.
د لیدنې پر مهال د ښارګوټي د اوسېدونکو د پاکو اوبو ستونزې وارزول شوې او د حل لپاره یې له اړوندو ادارو سره د عملي اقداماتو په اړه خبرې وشوې. د اوبو د ذخیرې او رسولو شبکې د جوړولو په برخه کې د اړوندو ادارو مسؤلینو د لازم اقدام ډاډ ورکړ.
همدارنګه، د مهاجرینو لپاره د پاکو اوبو د لېږد په موخه د جلالاباد ښاروالۍ له لوري د یوه ټانکر د خدمتونو د برابرولو په اړه خبرې وشوې، چې ښاروالۍ د دې خدمت د وړاندې کولو ډاډ ورکړ.
د ننګرهار د عامې روغتیا ریاست له مسؤلینو سره هم د ښارګوټي د اوسېدونکو لپاره د لومړنیو روغتیايي خدمتونو د برابرولو په اړه خبرې وشوې. یاد ریاست ډاډ ورکړ چې ګرځنده روغتیايي ټیم به په اوونۍ کې څو ځله ښارګوټي ته ځي او اوسېدونکو ته به لومړني روغتیايي خدمات وړاندې کوي.
ګډ کمېسیون له راستنېدونکو کورنیو سره هم وکتل، ستونزې او غوښتنې یې واورېدې او د اړوندو ادارو له لوري یې د همکارۍ ډاډ ورکړ.
د کمېسیون مشر انجینر احمدالله زاهد د مهاجرینو د اساسي اړتیاوو پوره کول د اړوندو امارتي ادارو، کورنیو او نړیوالو مؤسسو او خیریه بنسټونو ګډ مسؤلیت وباله او د پاکو اوبو، لومړنیو روغتیايي خدمتونو او د ژوند د مناسبو شرایطو د برابرولو لپاره یې پر دوامدارې همغږۍ او ګډو هڅو ټینګار وکړ.
