په ارزګان کې د ښاري سرغړونې د مخنیوي په موخه څارنه ترسره شوه
۱۴۴۸/۴/۲۲
د ارزګان ولایت د کور او ښار جوړولو ریاست اړوند تخنیکي ټیم، د خپل کاري پلان له مخې، د ښار د درېیمې او څلورمې ناحیې په اړوندو ساحو کې د ساختماني فعالیتونو او ښاري پلانونو د تطبیق د څارنې په موخه تخنیکي لیدنه ترسره کړه.
د څارنې پر مهال د څلورمې ناحیې اړوند د خیرو کاریز په پلان شوې ساحه کې ولیدل شول چې یوه استوګنیزه نمره د سوداګریزو هټیو د جوړولو لپاره کارول کېده. تخنیکي ټیم د یادې ساحې د منظور شوي پلان له مخې د استوګنیزې کارونې په اړه د ساحې مالک ته لازمې لارښوونې وکړې او د سوداګریزو هټیو د جوړولو د چارو د درولو غوښتنه یې وکړه.
د دې څارنې موخه د منظور شوو ښاري پلانونو د تطبیق ډاډ، د غیرقانوني ساختماني فعالیتونو مخنیوی او د راتلونکو ښاري پلانونو پر وړاندې د خنډونو د رامنځته کېدو مخنیوی دی.
د ارزګان ولایت د کور او ښار جوړولو ریاست تخنیکي ټیمونه د ښاري نظم د ټینګښت او د ښاري سرغړونو د مخنیوي په موخه خپلې څارنې په دوامداره توګه ترسره کوي.
