له صیادو څخه نوي کابل ښار ته د پاکو اوبو د انتقال ستره پروژه د ډیزاین په مرحله کې ده
۱۴۴۸/۴/۱۰
د نوي کابل ښار د پراختیا او د ښار د راتلونکو اوبو اړتیاوو د تأمین په موخه، له صیادو اوبیزې سرچینې څخه نوي کابل ښار ته د پاکو اوبو د انتقال ستره او حیاتي پروژه د نوي کابل ښار عمومي ریاست د تخنیکي او مسلکي ټیم له لوري د ارزونې او ډیزاین په مرحله کې ده.
د موجودې تخنیکي طرحې له مخې، د صیادو له اوبیزې سرچینې څخه نوي کابل ښار ته د اوبو د انتقال لپاره شاوخوا ۵۵ کیلومتره اوږد انتقالاتي مسیر په پام کې نیول شوی دی، چې د پروژې له بشپړېدو سره به د ښار د پراخېدونکو اوبو اړتیاوو د تأمین په برخه کې مهم ظرفیت رامنځته شي.
د جاپان د نړیوالې همکارۍ ادارې (جایکا) د ۲۰۱۲ میلادي کال د ترسره شوو مطالعاتو او امکان سنجۍ له مخې، د نوي کابل ښار د نفوس او ښاري اړتیاوو لپاره د هر وګړي ورځنی د اوبو مصرف ۱۵۰ لیتره په پام کې نیول شوی دی. د یادو مطالعاتو پر بنسټ، د نوي کابل ښار د لومړي، دوهم، درېیم او څلورم پړاوونو، د کابل ښار د اوولسمې ناحیې او الشیخ ښارګوټي د اړتیاوو په ګډون، په مجموعي ډول شاوخوا ۷.۳۴ متر مکعب اوبه په یوه ثانیه کې اړتیا اټکل شوې، چې کلنی حجم یې شاوخوا ۲۳۳.۴ میلیونه متر مکعب اوبو ته رسېږي.
د ترسره شوو مطالعاتو له مخې، د صیاد ځمکې لاندې اوبیزه زیرمه د نوي کابل ښار د اوبو د تأمین لپاره له څلورو وړاندیز شوو سرچینو څخه د لومړیتوب وړ سرچینو په توګه په پام کې نیول شوې ده.
دغه اوبیزه سرچینه د پنجشېر او غوربند سیندونو د تقاطع نقطې ته نږدې، د غوربند سیند په جنوبي اړخ کې موقعیت لري او له نوي کابل ښار څخه شاوخوا ۵۵ کیلومتره واټن لري.
د جایکا د مطالعاتو له مخې، په صیاد سیمه کې د ځمکې لاندې اوبو طبیعي زیرمه د پام وړ ظرفیت لري، د طبیعي اوبیزو طبقو څخه د اوبو د اخیستلو ظرفیت شاوخوا ۴ متر مکعب په یوه ثانیه او کلنی ظرفیت یې شاوخوا ۱۲۶.۱۴۴ میلیونه متر مکعب اټکل شوی دی. همدارنګه، د جایکا د تخنیکي سپارښتنې له مخې، که د اوبو د ترلاسه کولو لپاره د نفوذي ګالري سیستم وکارول شي، د اوبو د اخیستلو ظرفیت تر ۶.۳ متر مکعب په یوه ثانیه پورې رسېدای شي، چې کلنی ظرفیت یې شاوخوا ۱۹۸.۶۷ میلیونه متر مکعب اټکل شوی او د نوي کابل ښار د اټکل شوې کلنۍ اړتیا شاوخوا ۸۵ سلنه جوړوي.
د دې سترې او حیاتي پروژې د تخنیکي ارزونې، مطالعاتو او ډیزاین چارې د نوي کابل ښار عمومي ریاست د تخنیکي او مسلکي ټیم له لوري پر مخ وړل کېږي، څو د اوبو د سرچینې، استخراج، انتقال مسیر او د نوي کابل ښار د راتلونکو اړتیاوو په پام کې نیولو سره معیاري او عملي طرحه رامنځته شي.
د نوي کابل ښار د پراختیا له پراخې طرحې سره هممهاله، د ښار د اوبو د اوږدمهاله او دوامدار تأمین لپاره د مناسبو اوبیزو سرچینو موندل او د هغو د انتقال معیاري سیستم رامنځته کول له اساسي زیربنایي اړتیاوو څخه دي. له صیادو څخه نوي کابل ښار ته د اوبو د انتقال پروژه د همدې اړتیا د پوره کولو په موخه طرحه شوې، چې د موجودو مطالعاتو او تخنیکي ارزونو پر بنسټ به د ښار د راتلونکو پراختیايي پړاوونو لپاره د اوبو د تأمین په برخه کې مهم ظرفیت رامنځته کړي.
