د کونړ زلزلهځپلو ته په ننګرهار کې استوګنیزې نمرې وویشل شوې
۱۴۴۷/۱۱/۱۷
د کور او ښار جوړولو وزارت له لوري د کونړ ولایت هغو زلزلهځپلو کورنیو ته، چې د وروستۍ زلزلې له امله یې کورونه ویجاړ شوي وو، د ننګرهار ولایت د ښېوې ولسوالۍ اړوند د ګمبیري په ساحه کې په زر جریبه ځمکه کې په نوي جوړ شوي ښارګوټي کې استوګنیزې نمرې وویشل شوې.
یاد ښارګوټی د معیاري ښاري پلان له مخې طرحه شوی، چې پکې د اوسېدو نمرې تر څنګ سړکونه او بنسټیزې اسانتیاوې په پام کې نیول شوې دي. همداراز، په دې ښارګوټي کې د ښوونځي، مدرسې، مساجد، روغتیایي کلینیک او هدیرې لپاره ځانګړې ځمکې ټاکل شوې دي، تر څو اوسېدونکو ته د یو منظم او باعزته ژوند بشپړ چاپېریال برابر شي.
په همدې مناسبت جوړه شوې غونډه کې د کور او ښار جوړولو وزارت محترم وزیر الحاج مولوي نجیب الله حیات حقاني، د ننګرهار ولایت د والي مرستیال مولوي غلام الرحمن حیدري، د علماوو د شورا رئیس او د زلزلهځپلو د مرکزي کمیسیون مشر شیخ خیر محمد فاروقي، د کونړ د جهادي مدرسې مشر شیخ عبدالقهار صدیقي، د ننګرهار ولایت د مقام استازی مولوي شمس العارفین او یو شمېر نورو مسؤلینو ګډون کړی و.
غونډه د شیخ عبدالقهار صدیقي په وینا پیل شوه، چې د کور او ښار جوړولو وزارت له هڅو یې مننه وکړه او د زلزلهځپلو کورنیو لپاره یې د لا زیاتو همکاریو غوښتنه وکړه.
ورپسې د کور او ښار جوړولو وزارت محترم وزیر الحاج مولوي نجیب الله حیات حقاني خبرې وکړې او ویې ویل، اسلامي امارت هڅه کوي چې زلزلهځپلې کورنۍ پیاوړې کړي او د ټولنې د فعالو غړو په توګه یې وروزي، څو د مرستې له اخیستونکو څخه د مرستې کوونکو کچې ته ورسېږي.
نوموړي د پلان پر اهمیت ټینګار وکړ او زیاته یې کړه: «پلان هغه ګټوره نسخه ده چې خړه دښته د سرو زرو په ارزښت بدلوي او د انساني ټولنې د پرمختګ لپاره عملي کېږي.»
په پای کې د ننګرهار ولایت د مقام استازي مولوي شمس العارفین خبرې وکړې او ویې ویل، چې د ننګرهار ولایت مقام د زلزلهځپلو د ملاتړ او د یاد ښارګوټي د لا ښه مدیریت لپاره هر ډول همکاریو ته چمتو دی.
