په زابل ولایت کې د اجباري کډوالو او راستنېدونکو لپاره د نمرو د ویش لړۍ پیل شوه
۱۴۴۷/۰۸/۱۱
د زابل ولایت په مرکز قلات ښار کې د اجباري کډوالو او راستنېدونکو وګړو لپاره د دوهم ښارګوټي د منظور شوي تفصیلي پلان پر بنسټ، د نمرو د ویش لړۍ د زابل ولایت د کور او ښار جوړولو ریاست د تخنیکي ټیم، د کډوالو چارو آمریت او مل پلاوي په همکارۍ پیل شوه.
د زابل ولایت د کور او ښار جوړولو ریاست محترم رئیس وویل، چې د یاد ریاست د تخنیکي ټیم او د کډوالو چارو آمریت له لوري د چمتو شوي پلان پر بنسټ کډوالو ته د نمرو د ویش بهیر پیل شوی او ټاکل شوې ده چې دا لړۍ به په لنډ وخت کې بشپړه شي.
نوموړي زیاته کړه، چې د نمرو د ویش تخنیکي کمېټې ته لازمې سپارښتنې شوې دي، څو نمرو ته د استحقاق اصل په پام کې نیولو سره او د منظور شوي پلان مطابق مستحقو کډوالو او راستنېدونکو ته نمرې وویشي.
