غزني کې د پنځوس بستریز روغتون له رغنیزو چارو څارنه وشوه
۱۴۴۷/۰۱/۱۱
د غزني ولایت د کور او ښار جوړولو ریاست تخنیکي ټیم، د معتادینو د ۵۰ بستریز روغتون له روانو رغنیزو چارو څخه څارنه وکړه.
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، په دغه لیدنه کې د روغتون د داخلي خونو د ترمیم جریان ارزول شو، او د روغتون لپاره د داخلي او خارجي رنګونو مناسب انتخاب هم ترسره شو، تر څو ودانۍ له ظاهري، روغتیایي او روحي پلوه هم یو منظم او مناسبه بڼه ولري.
ښاغلي مولوي متقي وویل، د قراردادي شرکت مسؤولینو ته واضح هدایت ورکړل شو چې د پروژې ټولې چارې باید د ورکړل شوي قرارداد، نقشې او انجنیري معیارونو مطابق، په ټاکلي وخت او د لوړ کیفیت سره ترسره شي.
د غزني ولایت د کور او ښار جوړولو ریاست ټینګار وکړ چې روغتیایي مرکزونه د عامې روغتیا د خدمت رسونې حیاتي بنسټونه دي او هر ډول ساختماني کار باید پکې په دقت، تخنیکي ارزښت او مسؤلیت سره ترسره شي.
