کاپیسا کې د کاسا ۱۰۰۰ پروژې په اوږدو کې د برښنا د ستنو نصب لپاره ۳۸ ځایونه تثبیت شول
د ښار جوړولو او ځمکو وزارت د ټولګټو پروژو د انسجام چارو ریاست رپوټ پر بنسټ، په تازه توګه د کاسا ۱۰۰۰ پروژې په اوږدو کې په کاپیسا ولایت کې د برښنا ستنو نصب لپاره ۳۸ ځایونه تثبیت شول.
د برښنا له دې شمېر ستنو څخه ۱۴ پایې پر شخصي ځمکو او ملکیتونو او ۲۴ هغه پر دولتي ځمکو او ملکیتونو نصب کیږي. دغه ځایونه د کاپیسا ولایت د کوهستان لومړۍ حصې او د کوهبند ولسوالۍ په بولغین، پفدم، سنجن، ګراو موري او خم زرګر کلیو کې تثبیت شوي دي.
کاسا ۱۰۰۰ د برښنا د انتقال ستره پروژه ده چې د ښار جوړولو او ځمکو وزارت د افغانستان برښنا شرکت او نورو اړوندو دولتي اداره سره په ګډه د هغه د مالکیت حق تثبیت، استملاک او د پروژې تطبیق لپاره د زمینې برابرولو دنده پر غاړه لري.
په دغه مسیر کې د ځینو دولتي ځمکو او ملکیتونو تثبیت سره، د ستنو د نصب لپاره زمینه برابره شوې ده.
د کاسا ۱۰۰۰ پروژې له لارې چې د نړیوال بانک په مالي مرسته تطبیق کیږي، د قرغزستان او تاجیکستان ۱۳۰۰ میګاواټه برښنا د افغانستان له لارې پاکستان ته لېږدول کیږي. د دغې سترې پروژې پر مټ، په زرګونه کورنۍ په افغانستان او پاکستان کې له برښنا څخه برخمنې کیږي.
د ښار جوړولو او ځمکو وزارت همدا اوس د دغې پروژې په اوږدو کې د مالکیت حق تثبیت، استملاک او ارزښت موندنې چارې په کابل، کاپیسا او پنجشېر ولایتونو کې پر مخ وړي.
