کاپیسا کې د اداري کمپلیکس د سنګ فرش سړک د عملي چارو پرانسته وشوه

۱۴۴۷ــ ۲ــ ۱۵

د کور او ښار جوړولو وزارت، چې په هېواد کې د ښاري ودې او پراختیا مسؤلیت په غاړه لري، دا ځل یې په کاپیسا ولایت کې یوه ستره پرمختایي پروژه رسماً پرانسته.

کاپیسا ولایت کې د اداري کمپلیکس د سنګ فرش سړک د عملي چارو د پرانستې مراسمو کې د دغه ولایت محترم والي قاري احسان الله بریال د ښه راغلاست وینا ترڅنګ ډاډ ورکړ، چې د دغې پروژې په بشپړوالي کې به رغنده رول لوبوي او ملاتړ به یې کوي.

ښاغلي والي ولس ته په خطاب کې وویل، دا یوه ستره لاسته راوړنه ده، چې د کور او ښار جوړولو وزارت له ادرسه پیلېږي او په وینا یې دغه ولایت کې به د ابادۍ او پرمختیایي چارو پیل لا دوام ومومي.

د پرانستې په دغه مراسمو کې، د کور او ښار جوړولو وزارت محترم سرپرست وزیر الحاج مولوي نجیب الله حیات حقاني وویل، خوښ دی چې په کاپیسا ولایت کې د ابادۍ د چارو پیل کوي او په خبره یې د دغې پروژې په پلي کېدا کې امارت له (الله) ج پرته بل چاته محتاج نه دی او هر څه له داخلي امکاناتو برابر دي.

ښاغلي وزیر مولوي نجیب الله حیات حقاني ولس ته ډاډ ورکړ، چې څه یې په وس پوره وي، د خلکو په خدمات کې به یې سرته رسوي.

نوموړي وویل، دوی د شعار نه، بلکې د عمل خلک دي، چې هر څه په عمل کې ثابتوي.

محترم مولوي حقاني، له قراردادي شرکت غوښتنه وکړه، چې چارې په پوره کیفیت او خپل وخت سرته ورسوي او دغه راز یې د کاپیسا ولایت د کور او ښار جوړولو محترم ریاست مکلف کړ، چې هر وخت یې له چارو څارنه وکړي.

ښاغلي سرپرست وزیر، د خپلو خبرو په دوام وویل، یاده پروژه د پنځه اعشاریه څلور څلوېښت (۵.۴۴) کیلو متره په اوږدوالي (۱۴) سړکونه دي، چې د (۳۰۶) میلیونه افغانیو په ارزښت ترسره کېږي، چې پنځوس سلنه کار یې پخوا ترسره شوی او پاتې پنځوس سلنه کارونه یې اوس پیل شول.

اوسمهال د یاد سړک پروژه د (۸۳) میلیون افغانیو په ارزښت جوړېږي.

ورپسې د قراردادي شرکت مسؤل انجنیر وفا، ژمنه وکړه چې قرارداد شوې چارې به په پوره کیفیت او خپل وخت سرته رسوي او په دغه برخه کې به هېڅ نوع تخلف او جعل نه کوي.

کاپیسا ولایت کې د اداري کمپلیکس د سنګ فرش دغه (۱۴) سړکونه بېلا بېلو برخو ته غځېدلي چې په بشپړېدو به یې د یاد ولایت خلکو ته ګن شمېر اسانتیاوې برابرې شي.