کابل ښار کې د پخوانیو ساحو د تاریخي اصالت ساتنه، د ښاري منظرې همغږي او د فرهنګي هویت خوندیتوب په موخه څارنه ترسره شوه
۱۴۴۷/۱۰/۲۶
د کور او ښار جوړولو وزارت، د پخوانیو ښارونو د ساتنې ریاست، چې د تاریخي آبداتو او فرهنګي میراثونو د خوندیتوب مسؤلیت لري، د کابل ښار په تاریخي سیمو کې یې د ناهمغږو مداخلو د مخنیوي په برخه کې خپلې څارنې لا پیاوړې کړې دي.
د یاد ریاست د مسلکي ټیمونو له لوري، د کابل ښار د سیند په غاړه هټیو (له پل باغ عمومي څخه تر پل خشتي پورې) څارنه وکړه او څرګنده شوه، چې د یو شمېر هټیوالو له لوري په لوړو چوکاټونو کې د لمریزې برېښنا تختې نصب شوي، چې دې چارې د سیمې تاریخي بڼه زیانمنه کړې او ننداریزه ګډوډي یې رامنځته کړې ده.
د پخوانیو ښارونو د ساتنې ریاست د خپلو قانوني دندو او د عالیقدر امیرالمؤمنین حفظه الله تعالی و رعاه د (۱) شمېرې فرمان (نېټه: ۵/۱/۱۴۴۵ هـ.ق) پر بنسټ ټینګار کوي، چې په تاریخي جوړښتونو کې هر ډول مداخله باید د فرهنګي میراثونو د ساتنې له اصولو سره سم ترسره شي.
همدارنګه، د نړیوالو معیارونو له مخې، په ځانګړي ډول د تاریخي میراثونو د ساتنې اړوند اصولو ته په کتو، د تاریخي اصالت ساتنه، د ښاري نندارې همغږي او د فرهنګي هویت خوندیتوب اړین بلل کېږي.
د یادو نیمګړتیاو پر بنسټ، په لوړو چوکاټونو کې د لمریزې برېښنا د تختو نصب، چې د ښار پر لید، نندارې، نظم او چاپېریالي یووالي منفي اغېزې لري، د تاریخي سیمو د ساتنې له اصولو سره په ټکر کې دي. د پخوانیو ښارونو د ساتنې محترم ریاست وایي، له همدې امله اړینه ده چې د مسؤلو ادارو له لوري په دې برخه کې بیاکتنه، تنظیم او لازم تدابیر ونیول شي، څو د سیمې د تاریخي هویت د تدریجي زیان مخه ونیول شي.
