په کندز کې د مهاجرینو د ښارګوټي اړوند شپږ زره جریبه ځمکه سروې شوه
۱۴۴۷/۹/۴
د کور او ښار جوړولو وزارت، د سروې او جي، ای ایس محترم ریاست تخنیکي ټیم له لوري د کندز ولایت ګلتېپه ولسوالۍ په عسقلان سیمه کې د مهاجرینو د ښارګوټي جوړولو په پار د توپوګرافیکي سروې چارې په بریالیتوب سره ترسره شوې.
یاده سروې په کندز کې د مهاجرینو لپاره د ښارګوټي جوړولو په موخه په شپږ زره (۶۰۰۰) جریبه ځمکه ترسره شوه.
د سروې او جي ای ایس ریاست له لوري په ساحه کې د ځمکې دقیق ابعاد او حدود تثبیتول شول، لوړې ساحې او طبیعي جوړښتونه ثبت شول، د ځمکې د موجوده وضعیت توپوګرافیکي نقشه برابره او د جي ای ایس سیستم له لارې د معلوماتو ډیجیټلي ثبت او تحلیل ترسره شو.
دغه معلومات به د پلان د طرحې، ارزونې او پرېکړې نیولو په بهیر کې مهم تخنیکي بنسټ وګرځي، څو راتلونکې ودانیزې او انکشافي چارې د معیاري ښاري اصولو مطابق تنظیم شي.
د کور او ښار جوړولو وزارت ژمن دی، چې د مهاجرینو د دایمي مېشتېدنې په پار معیاري ځمکې تثبیت او تشخیص کړي او د منظم پلان له مخې یې نمره نمره پرې ووېشي.
