په نوي کابل ښار کې د ابادۍ چارې چټکې شوې؛ د ولس د هوساینې لپاره شپه او ورځ کار روان دی
۱۴۴۷/۱۲/۶
د نوي کابل ښار د ابادۍ او پراختیا چارې په بېساري ډول چټکې شوې دي او اوس د اړتیا له مخې د آن کله کله د شپې له خوا هم د پروژې کارونه دوام لري.
له کله چې د کور او ښار جوړولو وزارت محترم وزیر الحاج مولوي نجیب الله حیات حقاني، د دغه وزارت کار کوونکو ته سپارښتنه وکړه، څو د ولس خدمت ته لومړیتوب ورکړي او د چارو په ترسره کولو کې له غیر ضروري رسمیاتو او ځنډ څخه ډډه وکړي، دا پرمختګ رامنځته شوی دی.
د یاد وزارت د رهبرۍ د لارښوونو پر بنسټ، تخنیکي او اجرایي ټیمونه په دوامداره توګه په ساحه کې حضور لري او هڅه کوي، څو د نوي کابل ښار بنسټیزې پروژې چارې ګړندۍ او په لوړ کیفیت بشپړې شي.
د شپې له خوا د کار دوام د دې ښکارندوی دی، چې امارت او په ځانګړې توګه د کور او ښار جوړولو وزارت د ولس اړتیاوو ته ژمن دی او غواړي د هېوادوالو لپاره عصري، منظم او پرمختللی ښار جوړ کړي.
د شپې له خوا د ماشینرۍ او کاري ټیمونو فعالیت د دې ثبوت دی، چې د نوي کابل ښار د ابادۍ لپاره عملي او جدي اقدامات روان دي.
تمه ده، چې د روانو هڅو په پایله کې به نوی کابل ښار د هېواد له مهمو معیاري او پرمختللو ښاري پروژو څخه وګرځي او په سلګونه زره کورنیو ته به د هوسا ژوند زمینه برابره شي.
