په نوي کابل ښار کې افغان نړیوال اسلامي پوهنتون ته زر جریبه ځمکه ورکول کېږي

۱۴۴۶/۱۲/۱۹

د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ هغه کمېټې ناسته وکړه، چې په ترکیب کې یې د لوړو زده کړو، کرنې، اوبو لګولو او مالدارۍ، مالیې، اطلاعات او فرهنګ، او د اوبو او انرژۍ محترم وزارتونه او د چاپېریال ساتنې محترم ملي اداره شتون لري.

دغه ناسته، د عالیقدر امیرالمؤمنین حفظه الله د حکم د عملي کېدا په موخه ترسره شوه، چې په کابل کې، افغان نړیوال اسلامي پوهنتون ته د پراختیا په موخه زر (1000) جریبه ځمکه ورکړل شي.

ښاغلی شیخ حمدالله نعماني وویل، د عالیقدر امیرالمؤمنین حفظه الله د حکم د تعمیل او د اسلامي نسل د سالمې روزنې او ښې راتلونکې په پار لازمه ده چې د نوي کابل ښار تر چتر لاندې ځمکو کې، افغان نړیوال اسلامي پوهنتون ته د پراختیا په موخه یاده ځمکه ورکړل شي.

په ناسته کې، د ځمکې د په نښه کولو او د پوهنتون د پراختیا، په تړاو دلایل وړاندې شول او هوکړه وشوه، چې که ټوله ځمکه یو ځای نه، نو په څو ځایونو کې دې ورته په نښه شي.

تمه ده چې په نوي کابل ښار کې به د افغان نړیوال اسلامي پوهنتون د بېلا بېلو پوهنځیو لپاره ودانۍ، لابراتوارونه، تحقیقاتي مرکزونه، کتابتونونه، د استادانو کورونه، د محصلینو لیلیه، کنفرانس خونه، مېلمستون، ورزشي ډګرونه، د خدماتو او ترانسپورت مناسب ځایونه، زېرمتون، شنې ساحې، د اوبو ذخیرې او نور اړین ځایونه، جوړ شي.