محترم محمد جواد پیکار د کونړ ولایت د خاص کونړ ولسوالۍ سټراټیژیک پلان منظور کړ
د ښار جوړولو او ځمکو سرپرست وزیر محترم محمد جواد پیکار د کونړ له والي محترم عبدالستار میرزکوال سره په خپل کار ځای کې ولیدل او د یاد ولایت اړوندو پروژو او پراختیايي برنامو په تړاو يې خبرې وکړې.
د کتنې په پیل کې د کونړ والي د ښار جوړولو او ځمکو وزارت له خوا په ياد ولايت کې د اداري کمپلکس او د پوهنتون استادانو ښارګوټي لپاره د سروې له ترسره کېدو مننه وکړه او د یو شمېر نورو پراختیايي پروژو په تړاو يې وړاندیزونه وکړل.
ورپسې محترم محمد جواد پیکار د تصفیې ریاست ته دنده وسپارله چې د جمهوري ریاست عالي مقام د حکم له مخې تر راتلونکو درېېو اوونیو پورې دې د کونړ سیند په شاوخوا سیمو کې د ۵۲۰۰ هېکټاره ځمکې د تصفیې چارې ترسره کړي.
د ښار جوړولو او ځمکو سرپرست وزیر له دې سره همهاله د ښاري پلان جوړونې پروژې او ښاري پروګرام جوړونې عمومي ریاست ته دندې وسپارلې چې د اسعد آباد پر اوسني ماسټر پلان د بیا کتنې له لارې د اوسنیو اړتیاوو له مخې سټرکچر پلان جوړ او تر څنګ یې د اسعدآباد نوي ښار لپاره د پلان جوړولو په موخه خپلې سروې پیل کړي.
محترم محمد جواد پیکار همدا رنګه اړوندو برخو ته سپارښتنه وکړه چې د کونړ ولایت د امنیتي او دفاعي ځواکونو شهیدو سرتېرو کورنیو، معلولینو او نورو اړمنو خلکو لپاره د ختیځ زون په یوه ولایت، په ځانګړي ډول په ننګرهار کې دې ځمکې تشخیص کړي.
د ښار جوړولو او ځمکو سرپرست وزیر په ورته وخت کې د ښاري پلان جوړونې پروژې ته هم لارښوونه وکړه چې د کونړ څلورو ولسوالیو: مروره، سرکاڼو، نورګل او څوکۍ لپاره دې د راتلونکي کال په لومړیو کې سټراټیژیک پلانونه چمتو کړي.
محترم محمد جواد پیکار له دې سره هممهاله سپارښتنه وکړه چې د کونړ ولایت په خاص کونړ ولسوالۍ کې د پوهنتون لپاره له ۱۴۰۰ جریبه ځمکې څخه ۱۰۰۰ جریبه د پوهنتون تدریسۍ ودانیو او ۴۰۰ جریبه نوره هغه د استادانو لپاره د استوګنیزو سیمو جوړولو په موخه جلا کړي.
د ښار جوړولو او ځمکو سرپرست وزیر په کونړ ولایت کې د ساختماني پروژو پر ژر تطبیق د ټینګار ترڅنګ د افغانستان د ډیزاین مرکز او د اداري کمپلکسونو برخې ته لارښوونه وکړه چې په لوړه کچه دې په اسعدآباد ښار کې د جوړېدونکي نندارتون ډیزاین چارې ترسره کړي.
محترم محمد جواد پیکار په پای کې د کونړ ولایت د خاص کونړ ولسوالۍ سټراټیژیک پلان هم منظور کړ او اړوندو برخو ته یې د تطبیق په موخه وسپاره.
