سویل ختیځ زون کې د کور او ښار جوړولو وزارت له لوري د ظرفیت لوړولو ورکشاپ پیل شو
۱۴۴۷/۲/۹
د کور او ښار جوړولو وزارت د کار کوونکو چارو ریاست محترم رئیس مولوي عبدالولي ارکاني وایي، پکتیا ولایت کې یې د سویل ختیځ زون (خوست، غزني، پکتیکا او پکتیا) د دغه وزارت د کار کوونکو لپاره د ظرفیت لوړولو پروګرام پیل کړ.
ښاغلی مولوي ارکاني وایي، یاد روزنیز ورکشاپ به پنځه ورځې دوام وکړي، چې د ۱۴۴۷ هجري قمري کال د صفرالمظفر میاشتې له ۹مې تر ۱۳مې نېټې پورې د پکتیا ولایت په مرکز ګردېز ښار کې سرته ورسېږي.
د یاد ریاست د ظرفیت لوړولو چارو محترم امر پښتون مراد وایي، دغه روزنیز پروګرام، چې د یاد وزارت د متخصصینو لهخوا تنظیم شوی، د پکتیا ولایت د مرستیال، پکتیا کې د کور او ښار جوړولو رئیس، د اقتصاد رئیس او د اطلاعاتو او فرهنګ رئیس په حضور کې پیل شو.
ښاغلی پښتون مراد وایي، په ورکشاپ کې ګډونوالو ته په تخنیکي سروې اصول او د کار طریقه؛ د غیرپلاني ساحو لپاره د پراختیایي پلانونو جوړول؛ د ودانیو ډیزاین او انجنیري معیارونه؛ د کار کوونکو د ارزونې سیستم؛ د استخدام د پروسې شفاف مدیریت او نورو اړینو برخو کې عملي او نظري زدهکړې ورکول کېږي.
یاد پروګرام د وزارت د رهبرۍ د ستراتیژیک پلان له مخې د سیمه ییزو ظرفیتونو د لوړولو، د خدماتو د معیاري کولو، او د ښاري پراختیا د مدیریت لپاره یو مهم ګام بلل کېږي.
