د کابل ښار کې د یو سړک له ودانیزو چارو څارنه وشوه
۱۴۴۶/۱۲/۸
د کور او ښار جوړولو وزارت له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې د کابل ښار په ۱۵مه ناحیه کې د سلولاین سړک د ودانیزو چارو له بهیر لیدنه او تخنیکي ارزونه وکړه.
ښاغلی مولوي حقاني وایي، یاد سړک له شهید هنگرها څلور لارې تر تایمني پنځم سړک پورې غځېدلی دی، چې دوی یې تخنیکي ارزونه وکړه.
نوموړی وایي، د ارزونې پّ مهال معلومه شوه، چې ځینې سرغړونې شته او نیمګړتیاوې رامنځته شوي دي.
د ترافیکي نښو نشتوالی، په ګولایو کې د خبرداري نښو نشتوالی، د اوبو د تخلیې کانالونو نه خوندیتوب، د مسافرو لپاره د تم ځای سرپناه نشتوالی، د پلي لارو بندوالی، او داسې نور هغه څه دي چې سرغړونې او نیمګړتیاوې بلل کېږي او په یاد سړک کې یې عیبونه پیدا کړي دي.
ښاغلی مولوي عبدالمنان حقاني وایي، تخنیکي پلاوي یې سپارښتنې کړي، چې یادې نیمګړتیاوې دې ژر تر ژره د اړوندو ادارو له خوا حل شي، څو د خلکو ژوند، تګ راتګ، ترافیکي نظم او ښاري ښکلا خوندي وساتل شي.
د کور او ښار جوړولو وزارت د اسلامي امارت د اصولو او ملي ښاري معیارونو له مخې، خپلو نظارتي هڅو ته دوام ورکوي.
