د ننګرهار د کور او ښار جوړولو ریاست لپاره نوی رئیس وګمارل شو

۱۴۴۷/۱۱/۱۷
د ننګرهار ولایت د کور او ښار جوړولو ریاست کې  د اداري چارو د لا پیاوړتیا او د کارونو د لا منظم پرمخ بیولو او په ځانګړې توګه د مهاجرینو د ښار ګوټو د چارو د چټک پرمخ بیولو په موخه نوې ګمارنه ترسره شوه.
د کور او ښار جوړولو وزارت د محترم مقام د وړاندیز پر بنسټ او د ا.ا.ا د ریاسة الوزرا محترم عالي مقام له لوري د منظورۍ له مخې، ښاغلی انجنیر احمدالله زاهد د ننګرهار ولایت د کور او ښار جوړولو ریاست لپاره د نوي رئیس په توګه وټاکل شو.
ښاغلی انجنیر احمدالله زاهد د کور او ښار جوړولو وزارت د محترم وزیر الحاج مولوي نجیب الله حیات حقاني له لوري د دې ریاست کار کوونکو ته ور وپیژندل شو.
د پېژندګلوۍ په دغه مراسمو کې د نوي ټاکل شوي رئیس دندو، صلاحیتونو او مسؤلیتونو ته اشاره وشوه او ترې غوښتنه وشوه چې خپلې چارې د صداقت، شفافیت او مسلکي ژمنتیا په روحیه ترسره کړي.
انجنیر احمدالله زاهد چې یو مسلکي او وړ انجنیر دی، ځکه خو د کور او ښار محترم وزیر لازمه وګڼله چې د منظمې ښاري پراختیا او د مهاجرینو د ښار ګوټو د چارو د چټک پرمختګ په موخه یاد مسؤلیت ور تر غاړې کړي.
ښاغلي انجنیر احمدالله زاهد ژمنه وکړه، چې ورسپارل شوې دنده به په بشپړ مسؤلیت، صداقت او ریښتینولۍ پر مخ وړي او په دغه برخه کې یې له الله ج توفیق وغوښت.
همدارنګه دننګرهار د کور او ښار جوړولو مخکينى رٸيس مولوي محمد نبي سعيد په پلازمينه کابل کې د کور او ښار جوړولو وزارت د تدارکاتو رياست د مشاور په توګه  وګمارل شو.
په ورته وخت کې ټینګار وشو چې اداري اصلاحات، همغږي او د خدمتونو چټکتیا د کور او ښار جوړولو وزارت له اساسي لومړیتوبونو څخه دي، چې تمه ده نوې ګمارنې به د چارو په اغېزمنتیا او د خدماتو په ښه والي کې لا مثبت بدلون راولي.