د قبالو ورکړې برخه کې شته ستونزې حل کېږي
۱۴۴۳/۱۱/۱۰
د ښار جوړولو او ځمکو وزارت محترم مالي او اداري مرستیال حافظ محمد امین فاروقي په مشرۍ د خواج رواش ښارګوټي د بلاکونو تخنیکي ټیم ناسته وکړه.
په دغه ناسته کې د قسطونو راټولولو او قبالې ورکړې برخه کې پر شته ستونزو خبرې وشوې چې هر لوري خپل نظریات او وړاندیزونه وړاندې کړل.
د کمیټې ګډونوالو پر هغه لارو چارو بحث وکړ چې له مخې یې وکولی شي د قسطونو په راټولولو او د قبالو په ورکړې کې اسانتیاوې رامنځته کېږي.
د ښار جوړولو او ځمکو وزارت محترم مالي او اداري مرستیال حافظ محمد امین فاروقي د ټولو له نظریاتو اورېدو وروسته وویل، چې د ښار جوړولو او ځمکو وزارت رهبري به د اصولو او قوانینو په رڼا کې له خپلو مشترکینو ملاتړ وکړي چې وکولی شي ناتمامه پروژې بشپړې کړي.
نوموړي اړوندو مسؤلینو ته دنده وسپارله، چې په ټولو برخو کې شته ستونزې په ګوته او د قانوني او اصولي حل لارو په موندلو سره یې ترتیب او مالي او اداري معینیت ته وړاندې کړي.
