ښار د ټولو لپاره برنامې (CFA) د رهبرۍ کمېټې ناسته وشوه
ښار د ټولو لپاره برنامې (CFA) د رهبرۍ کمېټې ناسته د ښار جوړولو او ځمکو سرپرست وزیر محترم محمد جواد پیکار تر مشرۍ لاندې او د دغه وزارت معینانو، رئیسانو او د سیمهییزو ارګانونو خپلواکې ادارې، کابل ښاروالۍ او یو.ان هبیتات استازیو په ګډون جوړه شوه.
د ناستې په لومړي سر کې د ښاروالیو قانون تعدیل، د غیررسمي ښاري سیمو ثبت پروګرام، د ملکیت سندونو وېش، کابل ښار کې د آدرس موندنې او د ښارونو پراختیايي پروګرامونو جوړولو څرنګوالي په تړاو د تېرې ناستې د پرېکړې په لوستلو سره د ترسره شویو فعالیتونو رپوټ وړاندې شو.
وروسته د ښار جوړولو او ځمکو سرپرست وزیر محترم محمد جواد پیکار کابل ښاروالۍ او د سیمهییزو ارګانونو خپلواکې ادارې ته دنده وسپارله چې تر راتلونکې یوې میاشتې پورې دې د ښارواليو په قانون کې تعدیل راولي او راتلونکې ناستې ته دې وړاندې کړي.
په دې توګه پرېکړه وشوه چې د کابل، هرات، مزار شریف، جلال آباد، فراه، کندهار، نیلی او بامیان ښاروالۍ دې د غیررسمي ښاري سیمو ثبت پروګرام چارې چټکې کړي او دې سره جوخت د یو ان هبیتات دفتر دې پر دې لار د شته خنډونو لیرې کولو په برخه کې کوټلي ګامونه واخلي. د ښار جوړولو او ځمکو سرپرست وزیر زیاته کړه چې د غیررسمي ښاري سیمو ثبت مقرره به تر تعدیلاتو وروسته کابینې ته وړاندې شي چې په پایله کې به د غیررسمي ښاري سیمو ثبت پروګرام تر چتر لاندې د ملکیت سندونو وېش لړۍ چټکه شي.
له اجنډا سره سم، ښار د ټولو لپاره د برنامې لاسته راوړنې په یوه پرېزنټېشن کې وړاندې شوې. په دې پرېزنټېشن کې په اتو ښارونو کې د ۷۷۵۴۰۵ کورونو ثبت، د ۴۸ زره ګټه اخېستونکیو کورنیو تثبیت، د ۱۳۸۷۵ ملکیت سندونو وېش، کابل ښار کې د آدرس موندنې د پروژې تطبیق چارو، د پراختیايي پلانونو د تطبیق لړۍ پیل او د ۱۰۲ غیررسمي سیمو د بیا رغونې او بهسازۍ پروژو تطبیق په اړه په مفصله توګه معلومات ورکړل شول.
محترم محمد جواد پیکار، د غیررسمي ښاري سیمو ثبت پروګرام یو له مهمو او د جلالتمآب جمهور رئیس له اساسي لومړیتوبونو یاد کړ او د هغه پر چټک تطبیق يې ټینګار وکړ. پر دې سربېره، د یو ان هبیتات له دفتر څخه غوښتنه وشوه چې د غیررسمي ښاري سیمو ثبت پروګرام په اډاڼه کې دې د یوه ډېټابېس په جوړولو کې له ښار جوړولو او ځمکو وزارت سره مرسته وکړي.
د ناستې په دوام د هرات ولایت په مسلخ ښارګوټي کې د ۲۵۰۰ کورونو ثبت، د بهسازۍ پروژو تطبیق په پار د مالي بوديجې ترلاسه کولو او همدا راز یاد ښارګوټي کې د کورنیو لپاره د ملکیت سندونو وېش په اړه معلومات وړاندې شول.
محترم محمد جواد پیکار د ساختماني چارو معینیت ته دنده وسپارله چې د بهسازۍ پلانونو ښه تطبیق او د غیررسمي ښاري سیمو ثبت پروګرام اډانه کې د ملکیت سندونو وېش لپاره د یو ان هبیتات دفتر سره په همغږۍ د عمل یو روښانه پلان جوړ او د هغه په رڼا کې دې کارونه پر مخ یوسي. دغه معینیت همدا رنګه دنده واخیسته چې هرات کې د مسلخ ښارګوټي کورونو سروې او ثبت په موخه دې بشري سرچینې په کار وګوماري او د یو ان هبیتات له دفتر څخه غوښتنه وشوه چې دغو کارکوونکیو ته دې روزنه ورکړي.
ښار د ټولو لپاره (CFA) د رهبرۍ کمېټې په دې ناسته کې پرېکړه وشوه چې د دغې کمېټې بله ناسته دې د ۲۰۲۰ کال په جنورۍ میاشت کې ترسره شي.
