ښار جوړولو او ځمکو وزارت سرپرست وزیر په پارلماني چارو کې د دولت وزارت سرپرست وزیر او د افغانستان د کرکټ بورد له رئیس سره وکتل
ښار جوړولو او ځمکو وزارت سرپرست وزیر محترم محمود کرزی په پارلماني چارو کې د دولت وزارت سرپرست وزیر محترم ضیا الحق امرخیل او د افغانستان د کرکټ بورد له رئیس محترم فرهان یوسفزی سره وکتل او د نړیوال کرکټ د میدان په جوړېدو خبرې وکړې.
په سرکې، د افغانستان کرکټ بورد رئیس محترم فرهان یوسفزی کرکټ یې د افغانستان خلکو او د جلالتمآب جمهور رئیس د پام وړ موضوع وګڼله او زیاته یې کړه چې د جمهور رئیس د لارښوونې سره سم په پام کې ده چې د کابل ښار د پل محمود خان سیمې ته نږدې د کرکټ نړیوال میدان د هندوستان هېواد په مالي مرسته جوړ شي چې په دې سره به نه یواځې افغانستان کرکټ بې سارې وده وکړي بلکې افغانستان به په راتلونکي کې د نړیوالو لوبو کوربه وي. د افغانستان کرکټ بورد رئیس وویل چې د جلالتماب جمهور رئیس د لارښوونې سره سم د دې موضوع په اړه به یوه مشخصه طرحه د اوبو، ځمکو او ښاري پراختیا په عالي شورا کې د منظورۍ لپاره وړاندې شي.
همدارنګه، په پارلماني چارو کې د دولت وزارت سرپرست وزیر او د افغانستان د کرکټ بورد غړی محترم ضیا الحق امرخیل د مهمو او ټولګټو پروژو د تطبیق په موخه د اړینو فرصتونو د برابرولو لپاره د ښار جوړولو او ځمکو وزارت مشرتابه هڅې وستایلې او محترم محمود کرزی یې یو هېوادپاله او ملي ګټو ته ژمن شخصیت وباله. محترم ضیا الحق امرخیل، د نوي نړیوال کرکټ میدان جوړېدل یې د کرکټ د ودې لپاره یو مهم اقدام وباله او د ښارجوړولو او ځمکو وزارت د مشرتابه څخه یې د یاد میدان د جوړونې لپاره د پام وړ ځمکې د انتقال غوښتنه وکړه.
ورپسې، د ښار جوړولو او ځمکو وزارت سرپرست وزیر محترم محمود کرزی لویو او ټولګټو پروژو تطبیق ته لاره هوارول د دې وزارت له مهمو کاري لومړیتوبونو څخه یاد کړ او ټینګار یې وکړ چې دا وزارت د کرکټ د پرمختګ او ودې لپاره هر راز همکاري ته چمتو ده.
ښار جوړولو او ځمکو وزارت سرپرست وزیر په پارلماني چارو کې د دولت وزارت سرپرست وزیر او د افغانستان د کرکټ بورد غړی محترم ضیا الحق امرخیل او د افغانستان کرکټ بورد رئیس محترم فرهان یوسفزي ته ډاډ ورکړ چې دا وزارت به یادې ادارې ته د ځمکې د انتقال په برخه کې له هیڅ راز همکارۍ ډډه ونکړي.
###
