په کابل ښار کې د افشار سیمې د ودانیو د قانوني وضعیت د څارنې لپاره د ښاري سرغړونو ریاست تخنیکي ټیم لیدنه ترسره کړه
۱۴۴۷/۰۵/۱۸
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني وایي، د دې ریاست اړوند تخنیکي ټیم د کابل ښار د پنځمې ناحیې د افشار سیمې له ودانیو څخه د څارنې او ارزونې لیدنه ترسره کړه.
یاده لیدنه د ښاري سرغړونو ریاست د محترم رئیس مولوي حقاني د هدایت پر بنسټ د نظارت او رسیدګي آمریت او د عامه پوهاوي آمریت د استازو په ګډه ترسره شوه. د څارنې موخه د افشار د سیمې په ځانګړي ډول د قمبر څلور لارې د بلاکونو شاوخوا د ودانیو د وضعیت ارزونه، د تخنیکي معیارونو څېړنه او د ښاري اصولو تطبیق و.
ښاغلي مولوي حقاني وویل، په ځینو برخو کې د تفصیلي پلان عملي کېدل په سمه توګه نه دي تطبیق شوي، خو هغه ودانۍ چې د زونینګ او تفصیلي پلان پر بنسټ جوړېږي، د معیارونو، ارتفاع، فاصله او د ځمکې د کارونې له اړخه وارزول شوې.
د عامه پوهاوي ټیم د څارنې پر مهال د پروژو مالکانو ته لازمې لارښوونې وکړې، تر څو د قانوني جواز له ترلاسه کولو وروسته، خپلې ودانیزې چارې د ښار جوړولو له اصولو او مقرراتو سره سم پر مخ یوسي او له سرغړونو څخه ډډه وکړي.
په پای کې، له ټولو مالکانو غوښتنه وشوه چې د خپلو پروژو اسناد او جوازونه د ښاري سرغړونو ریاست ته وړاندې کړي، څو له تصویب شویو پلانونو سره یې مطابقت وڅېړل شي. ریاست ټینګار کړی چې د هر ډول سرغړونې په صورت کې به قانوني او اصولي اقدامات ترسره کېږي.
د کور او ښار جوړولو وزارت د ښاري سرغړونو د مخنیوي ریاست د ښارونو د منظم پرمختګ او د قانوني ودانیو د ترویج په موخه، د هېواد په بېلابېلو سیمو کې د دوامدارو څارنو او عامه پوهاوي پروګرامونه پر مخ وړي، څو د ښاري نظم، خوندیتوب او معیارونو د تطبیق کچه نوره هم لوړه شي.
