په هلمند ولایت کې مهاجرینو ته د استوګنیزو نمرو د وېش بهیر پیل شو
۱۴۴۷/۱۱/۲۷
په هلمند ولایت کې راستنېدونکو مهاجرینو ته د دایمي استوګنیزو نمرو د وېش بهیر په رسمي ډول پیل شو.
د مهاجرینو د اسانتیا او د چارو د منظم تنظیم په موخه، د استوګنیزو نمرو د وېش ولایتي هیئت له لوري دوه جلا تخنیکي او اداري هیئت ټاکل شوي دي، چې یو یې د فورمو د ترتیب او اداري پروسې مسؤلیت پر غاړه لري او بل یې په ساحه کې مستحقو مهاجرینو ته د استوګنیزو نمرو د تسلیمۍ چارې پر مخ وړي.
د وېش ټول بهیر د شفافیت، عدالت او منظمې همغږۍ پر بنسټ ترسره کېږي او د تأیید شوو لېستونو له مخې مستحقو کورنیو ته نمرې سپارل کېږي.
همداراز، د بې نظمۍ او ګڼې ګوڼې د مخنیوي لپاره د هرې ورځې ځانګړي لېستونه له اړوندو ادارو او رسنیو سره شریکېږي، څو یوازې ټاکل شوي کسان مراجعه وکړي.
د یادونې وړ ده، چې د ښځینه مراجعه کوونکو د اسانتیا او درناوي په موخه هغوی ته د فورمو د ترلاسه کولو په برخه کې لومړیتوب ورکړل شوی دی.
