په هلمند ولایت کې معلولینو مجاهدینو ته د استوګنې نمرو د وېش لړۍ پیل شوه
۱۴۴۸/۲/۲۴
د اسلامي امارت د کابینې د محترم مقام د ۱۶مې مصوبې د حکم د تطبیق په موخه، په هلمند ولایت کې هغو مستحقو معلولینو مجاهدینو ته، چې د بدن دوه یا تر دوو زیات غړي یې معلولیت لري، د استوګنې نمرو د وېش لړۍ په رسمي ډول پیل شوه.
د هلمند ولایت د کور او ښار جوړولو ریاست له لوري د دې پروسې په پيل سره، مستحقو معلولینو مجاهدینو ته د استوګنې د مناسب ځای د برابرولو په برخه کې عملي ګام پورته شو، چې موخه یې د یادې مصوبې د حکم له مخې د هغوی د سرپناه ستونزې ته د حل زمینه برابرول دي.
د وېش د بهیر پر مهال د مستحقینو اسناد او اړوند معلومات د ټاکل شویو اصولو له مخې ارزول کېږي، ترڅو د استوګنې نمرو د تخصیص پروسه د حقالاولیت، روڼتیا او عدالت پر بنسټ ترسره او هر مستحق کس له خپلې قانوني او اصولي برخې برخمن شي.
د هلمند ولایت د کور او ښار جوړولو ریاست په پام کې لري چې د دې پروسې ټول پړاوونه د اړوندو اصولو او مقرراتو په رعایت، منظم ډول بشپړ کړي او مستحقو معلولینو مجاهدینو ته د استوګنې د ځای د برابرولو په برخه کې لازمې اسانتیاوې رامنځته کړي.
