په نوي کابل ښار کې د ودانیزو چارو د پیل لپاره تابیا ونیول شوه
۱۴۴۷/۶/۲۲
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې په نوي کابل ښار کې د پراختیا ورکوونکو شرکتونو له مسؤلینو سره وکتل.
په دغه کتنه کې، په نوي کابل ښار کې د ودانیزو چارو د پیل او د پلانونو پر څرنګوالي خبرې وشوې.
د کور او ښار جوړولو وزارت محترم وزیر الحاج مولوي نجیب الله حیات حقاني وویل، لازمه ده چې پراختیا ورکوونکي شرکتونه خپل تفصیلي پلانونه د ماسټر پلان او ودانیز پلان سره سم برابر کړي، ترڅو یې چارې په مطابقت کې پر مخ لاړې شي.
نوموړي اړوندو شرکتونو ته دنده وسپارله چې د فرعي سړکونو د پیل لپاره خپله هراړخیزه تابیا ونیسي او په زیربنایي چارو دې یې لاس پورې کړي.
ټاکل شوې چې په نږدې وخت کې د کابل – بګرام عمومي سړک د پخولو چارې پیل شي او ترڅنګ یې شرکتونو د فرعي سړکونو په جوړولو بوخت شي.
محترم وزیر مولوي نجیب الله حیات حقاني، له شرکتونو وغوښتل چې جوړ شوي تفصیلي پلانونه د ویزه کولو لپاره وزارت ته واستوي، ترڅو یې تخنیکي ټیمونه و ارزوي او د تخنیکي ټیم تر تائید وروسته ویزه شي.
په نوي کابل ښار کې د پراختیا ورکوونکو شرکتونو محترمو مسؤلینو ومنله چې پلانونه به د ویزې لپاره را استوي او په ټوله کې به چارې د پلان مطابق په لنډ وخت کې پیلوي.
