له لوګر ولایت څخه څه باندې درې میلیونه افغانۍ عواید راغونډ شوي
د لوګر ولایت د ښاري پراختیا او ځمكو ریاست په دې وروستیو كې د دولتي ادارو، خصوصي شركتونو او اشخاصو له پاتې پیسو څخه درې میلیونه افغانۍ راټولې کړي چې د تېر حکومت په پرتله ۸۰ سلنه زیاتوالی په کې راغلی.
په لوګر ولایت کې یو شمیر نورې هم ادارې څه د پاسه دوه میلیونه افغانۍ پوروړې دي، چې په دې ریاست کې یې د راټولولو لپاره کار روان دی.
د لوګر ولایت د ښار جوړولو او ځمكو ریاست د هېواد له فتحې او د اسلامي امارت له حاکمیت وروسته د روان كال د لړم په میاشت كې یو ځل بیا په فعالیت پیل وكړ او د عایداتو د راټولولو په برخه كې یې نورې ښې لاسته راوړنې هم ترلاسه كړې دي.
یاد ریاست په دې بریالی شوی چې د كلنۍ ثابتو عوایدو لپاره چې ۱۱ میلیونه افغانیو ته رسیږی زمینه برابره كړي.
د یادولو وړ ده، چې ۱۱۵۰ جریبه دولتی ځمکه، چې ۳۰۰ جریبه ځمکه یې د قلعه شکار په دښته کې، ۳۵۰ جریبه ځمکه د قلعه ملک په سیمه کې او ۵۰۰ جریبه نوره یې د محمدآغې ولسوالۍ د قلعه ناظر دشت دولت په سیمه کې سروې، تثیبیت او کروکي کړې ده.
دا ځمکه د اجاره کولو لپاره چمتو ده چې په نږدې راتلونکي کې به داوطلبۍ ته وړاندې شي.
علاقمندان او متقاضیان کولای شي د لوګر ولایت د ښار جوړولو او ځمکو محترم ریاست ته ورشي او خپل غوښتنلیکونه ورته وسپاري.
