د کور او ښار جوړولو وزیر د بامیان ولایت له والي او ښاروال سره وکتل
۱۴۴۷/۶/۲۲
د کور او ښار جوړولو وزارت محترم وزیر الحاج مولوي نجیب الله حیات حقاني، په خپل کاري دفتر کې د بامیان ولایت له محترم والي الحاج مولوي عبدالله سرحدي، د دغه ولایت محترم ښاروال مولوي روزي محمد افکار او د بامیان ولایت د کور او ښار جوړولو محترم رئیس انجنیر امانالله امان سره وکتل او پر یو شمېر مهمو موضوعاتو یې خبرې وکړې.
دغه کتنه، د عاليقدر امیرالمؤمنین حفظه الله د حکم د تطبیق په موخه ترسره شوه چې څنګه کېدای شي په بامیان ولایت کې هغه کورنۍ چې په غارونو کې اوسېږي، یو منظم ښارګوټی ورته جوړ او عصري ژوند پیل کړي.
د بامیان والي، د دغه ولایت د وضعیت، مهاجرینو او په مغارو کې د اوسېدونکو د ژوند په تړاو معلومات وړاندې کړل او د ښاري ژوند د وضعیت ښه کېدو په پار یې د همکارۍ غوښتنه وکړه.
یادونه وشوه چې د بامیان ولایت په مغارو کې اوسېدونکو لپاره د ښارګوټي د جوړولو په موخه د ځمکې لېږد ترسره شوی او باید په تفصیلي پلان جوړولو یې ژر کار پیل شي.
د کور او ښار جوړولو وزارت محترم وزیر الحاج مولوي نجیب الله حیات حقاني وویل، د بامیان ولایت د کور او ښار جوړولو ریاست دې ژر تر ژره د یاد ښارګوټي لپاره تفصیلي پلان چمتو او د ویزه کولو لپاره دې یې وزارت ته را واستوي.
دغه راز په ناسته کې، د بامیان ولایت په مهاجرینو ښارګوټي کې د چارو د پرمختګ په اړه معلومات وړاندې شول چې د ښارګوټي د سړکونو د هوارولو پړاو بشپړ شوی، د استوګنې ۳۰ نمرو خط اچونه شوې ده او پر اړمنو مهاجرو کورنیو وېشل شوې دي.
د یادولو ده چې، بامیان دوه ماسټر پلانونه لري، یو ښاري ماسټر پلان او بل کلتوري ماسټر پلان او ترڅنګ یې یکهولنګ، ورس، پنجاب او سیغان ولسوالۍ هم پلانونه لري چې پراختیا یې چارې به یې له مخې انکشاف ومومي.
