د کابل ښار د پراختیا په موخه ګډه ناسته وشوه
۱۴۴۵/۸/۱۴
د کور اوښار جوړولو وزارت د ښاري چارو د محترم مرستیال شیخ مدار علي کریمي بامیاني او د کابل د محترمې ښارالۍ د مرستیال محترم صدرالدین تاجک په مشرۍ ګډ هیئت د کابل ښار د پراختیا په موخه ناسته تر سره کړه.
دغه ناسته کې د کور او ښار جوړولو وزارت مسؤلینو د کابل ښار لپاره د جایکا له لوري جوړ شوي ماسټر پلان په اړه دلایل وړاندې شول او د کابل ښاروالۍ د استازو له لوري د ساساکي پلان او ښاري طراحۍ پلان په اړه دلایل وړاندې شول.
د کور او ښار جوړولو وزارت د ښاري چارو مرستیال محترم شیخ مدار علي کریمي بامیاني وویل، هڅه دې وشي چې د شته پلانونو ترمنځ توپیرونه او ځانګړتیاوې په ګوته شي، او د کابل ښار د سړکونو غځولو او انډولیزې پراختیا لپاره دې پلانونه په سمه توګه پلي شي.
د کابل ښاروالۍ محترم مرستیال وویل، د کابل ښار د پراختیا مخکینۍ ستونزې باید حل شي او د کابل شته نفوس ته په کتلو دې پر نوي پراختیايي پلان کار وشي.
په یاده ناسته کې، هوکړه وشوه، چې د وضعیت لا ښه کېدو په موخه دې د کور او ښار جوړولو وزارت او د کابل محترمې ښاروالۍ انجنیران غوره لارې چارې په ګوته کړي چې په راتلونکې ناسته کې به نظرونه توحید او بیا وروسته د ا.ا.ا له محترمې کابینې سره شریک شي.
