د کابل د پخوانیو ښارونو د تاریخي او لرغونو سیمو د پېژندنې او سروې بهیر له میربچه کوټ ولسوالۍ پیل شو
۱۴۴۸/۳/۲۳
د کور او ښار جوړولو وزارت د پخوانیو ښارونو د ساتنې ریاست له لوري د کابل ولایت د ولسوالیو د تاریخي او لرغونو سیمو د پېژندنې، تخنیکي او ټولنیزې سروې او جغرافیایي موقعیت د تثبیت بهیر له میربچه کوټ ولسوالۍ څخه پیل شو.
د دې سروې موخه د تاریخي او لرغونو سیمو پېژندنه، د جغرافیایي موقعیت تثبیت، د تاریخي ودانیو د معماري ځانګړنو ارزونه، د سیمو د اوسني وضعیت په اړه د لومړنیو معلوماتو راټولول او د تاریخي او فرهنګي اثارو لپاره د منظم معلوماتي سیستم جوړول دي.
د سروې په جریان کې د تخنیکي ټیم له لوري د تاریخي او لرغونو سیمو موقعیت، حدود، اوسنی وضعیت، تاریخي ارزښت او معماري ځانګړنې ثبتېږي او له سیمې څخه تخنیکي انځورونه هم اخیستل کېږي. همداراز، د سیمې له اوسېدونکو او د تاریخي معلوماتو له لرونکو کسانو سره د خبرو له لارې د سیمو د تاریخ او مخینې اړوند معلومات راټولېږي.
راټول شوي معلومات به د تاریخي سیمو د نقشو جوړولو، د معلوماتو د منظمې زېرمې رامنځته کولو او په راتلونکې کې د تاریخي او فرهنګي میراثونو د ساتنې، بیارغونې او مدیریت په برخو کې د پلان جوړونې لپاره وکارول شي.
د یادونې وړ ده چې دغه سروې به له میربچه کوټ ولسوالۍ وروسته د کابل ولایت په نورو ټاکل شوو ولسوالیو کې هم د کاري پلان له مخې په پړاوونو کې دوام وکړي، څو تاریخي او لرغونې سیمې په منظم ډول وپېژندل، ثبت او مستندې شي.
