د پکتیکا انګور هډې د سړک له رغنیزو چارو څارنه وشوه
20/8/1445
د پکتیکا د کور او ښار جوړولو محترم رئیس مولوي محمد طاهر سیف الجهاد وايي، د ځمکني ترانسپورټ د لوی مدیریت په غوښتنه او د ولایت محترم مقام د حکم پر اساس، د دې ریاست تخنیکي ټیم د شکین ولسوالۍ د انګور هډې د سړک له رغنیزو چارو څارنه وکړه.
د مولوي سیف الجهاد په خبره، د یادې پروژې د کمپکشن چارې ۹۰ سلنه، د هوارولو او د لولنګ کارۍ چارې په بشپړ ډول پای ته رسیدلي دي.
نوموړی وایي، قراردادي شرکت ته یې سپارښتنه وکړه، چې د قرارداد پاڼې مطابق باید د سیند له ډبرو کار واخیستل شي چې له خاورو پاکې وي، تر څو راتلونکي کې کوم مشکل رامنځته نه شي.
د کور او ښار جوړولو وزارت په مرکز او ولایتونو کې د ادارو په غوښتنه د دولتي او خصوصي پروژو له رغنیزو چارو څارنه کوي، تر څو چارې په انجنیري او مسلکي ډول ترسره او کیفیت او معیار خوندي شي.
