د شبرغان-دشت الوان وارداتي برېښنا پايو لپاره له ۶۰ فيصده د زياتو محلونو د مالکيت حق تثبيت وشو
د ښار جوړولو او ځمکو وزارت د ټولګټو پروژو چارو د انسجام ریاست رپوټ له مخې، د ترکمنستان د ۵۰۰ کيلو ولټه وارداتي برېښنا پروژې په تطبيق کې د اسانتياو رامنځته کولو په موخه د شبرغان-دشت الوان په مسير کې د پايو د نصب لپاره د محلونو د مالکيت حق د تثبيت چارې ۶۵ سلنه بشپړې شوې.
د شمال څلورو ولايتونو په مسير کې له ۷۷۵ عمومي شمېرو له ډلې، د ۴۴۰ پايو د نصب محلونو چې ۱۲۰ د شبرغان په مربوطاتو کې، ۱۲۳ په بلخ، ۱۷۴ په سمنګان او ۲۳ نور په بغلان کې دي، د مالکيت حق د تثبيت او ارزښت ټاکنې چارې بشپړې شوي دي.
همدارنګه د ۴۴۰ پايو د نصب محلونو له ډلې ۲۴۱ يې دولتي او ۱۹۹ يې د شخصي خلکو ملکيتونه تثبيت شوي دي.
د اسيایي انکشاف بانک د ۶۰ ميليونو ډالرو په مرسته د ۱۰۰۰ ميګاواټه په ظرفيت د ترکمنستان ۵۰۰ کيلو ولټه وارداتي برېښنا د جوزجان، بلخ او سمنګان له مسير څخه د بغلان ولايت تر دشت الوان پورې لېږدول شوې او په دې مسير کې د کابل، لوګر، ننګرهار، کونړ، غزني، ميدان وردګ او کندهار ولايتونه به هم له برېښنا څخه برخمن شي.
