بادغیس کې د یوې پراختیايي پروژې رغنیزې چارې پیل او د یوې بلې پروژې رغنیزې چارې له ۲۰ سلنې واوښتې
ښارجوړولو او ځمکو وزارت د باغیس ولایت د مرکز قلعه نو ښار په پنځمه ناحیه کې د دې ولایت د لوړو زده کړو موسسې د خوړنځي ودانۍ، احاطې دیوال او پخلنځي رغنیزې چارې پیل کړې.
دا پروژه په ۴۹۶ متر مربع ځمکه کې په دوه پوړونو د ۲۶ میلیونه او ۴۰۰ زره افغانیو په ارزښت د دولت له پراختیايي بودیجې جوړیږي.
ښارجوړولو او ځمکو وزارت همداراز د بادغیس ولایت د مرکز قعله نو ښار په پنځمه ناحیه کې د دې ولایت د لوړو زده کړو موسسې د لیلیې ودانۍ رغنیزې له ۲۰ سلنې ډېرې بشپړې کړي دي.
دا ودانۍ په ۱۳۵۰ متر مربع ځمکه کې په څلورو پوړونو د ۷۸ میلیونه او ۴۰۰ زره افغانیو په ارزښت د دولت له پراختیايي بودیجې د روان کال تر پایه پورې جوړیږي.
ښارجوړولو او ځمکو وزارت د پوهنې او لوړو زده کړو وزارت د پروژو په تطبیق سره، د هېواد په کچه زده کوونکو او محصلینو ته د زده کړې مناسبه فضا برابروي.
###
