د پروژو د چارو او انوایسونو په اړه خبرې وشوې
۱۴۴۷/۲/۲۴
د کور او ښار جوړولو وزارت محترم مالي او اداري مرستیال الحاج محمد ارسلاح خروټي، په خپل کاري دفتر کې د اړوندو ریاستونو له رئیسانو او مسؤلینو سره غونډه وکړه.
په دغه غونده کې، په بلخ او کندهار ولایتونو کې د صحي محصولاتو او درملو د لابراتوارونو د تعمیرونو پروژو، د تهیه مسکن استوګنیزې پروژې، لوګر او کندهار ولایتونو کې د لوی نظارت ادارې اړوند پروژو، میدان ښار کې د ترانسپورتي ترمینل دوهم لاټ پروژې، اټومي انرژۍ ادارې اړوند پروژه، استقلال ښارګوټي پروژه، د کور او ښار جوړولو وزارت اړوند د ساختماني موادو د ټسټ لابراتوار پروژه او نورو پروژو په اړه بحثونه وشول.
ښاغلي مالي او اداري مرستیال الحاج محمد ارسلاح خروټي وویل، موخه دا ده چې په تېر مجلس کې د هرې پروژې په تړاو اړوند ریاست ته دنده سپارل شوې وه، باید د خپلو کړنو او اجرأتو راپور وړاندې کړي.
د پروژو د کار حجم، تدارکاتي برخې، انوایسونه، د کار پیل او ختم، نقشې او نور موارد هغه ټکي وو، چې هر اړخیزې خبرې پرې وشوې.
په غونډه کې د برخوالو ریاستونو رئیسانو هر یو د خپلو اجأتو په تړاو معلومات وړاندې کړل او په ځینو برخو کې یې د همکارۍ غوښتنه وکړه.
محترم مالي او اداري مرستیال ډاډ ورکړ، چې د ستونزو حل برخه کې به همکاري کوي او له ټولو اړوندو ریاستونو یې غوښتنه وکړه، چې پاتې چارې دې ژر تر ژره په ټاکلي وخت سرته ورسوي.
نوموړي وویل، اړوند ریاستونه دې د چارو د ترسره کېدو په مهال د رامنځته کېدونکو ستونزو په اړه وخت په وخت راپور شریکوي او مسؤلیتونه دې په سمه توګه ترسره کوي.
د کور او ښار جوړولو وزارت هڅې کوي، چې د پروژو چارې په وخت سرته ورسېږي او ګټې اخیستنې ته یې وسپاري.
