د قالین اوبدونکو ښارګوتو د پروژې پر وړاندې د شته ستونزو او ننګونو ارزونه وشوه
1443/09/25
د ښار جوړولو او ځمکو وزارت سرپرست محترم مولوي حمد الله نعماني د خپل کار په دفتر کې د قالین اوبدونکو ټولنې له غړو سره وکتل او د دوی د ستونزو او ننګونو د حل او د پروژې د پیل په اړه یې خبرې وکړې.
لومړی د قالین اوبدونکو ټولنې غړو د قالینو د صنعتي ښارګوټو پر وړ اندې د شته ستونزو په اړه بشپړ معلومات ورکړل او خپل وړاندیزونه یې واورول.
ورپسې د ښار جوړولو او ځمکو وزارت سرپرست ښاغلي مولوي حمد الله نعماني د یادو ښارګوټو د اهمیت او د هغې د ودې او پراختیا په اړه خبرې وکړې.
نوموړي دغه ډول پروژې د فقر او بې روزګارۍ په له منځه وړلو کې مهمې یادې کړې چې وزارت یې د پیلولو لپاره لېوالتیا لري.
محترم مولوي حمدالله نعماني د قالین اوبدونکو ټولنې غړو ته لارښوونه وکړه چې یوه ګډه کمېټه دې جوړه کړي او د یادو پروژو پورې اړوندې ټولې ستونزې او ننګونې دې په ګوته کړي چې د حل لپاره یې وزارت لاس په کار شي او د یوې جامعې طرحې له مخې یې د پیلولو چارې پیل شي.
