له ژمنې تر عمله؛ ټاکل شوې چې په نږدې راتلونکي کې په درې نورو ولایتونو کې اړمنو راستانه شوو مهاجرو کورنیو ته استوګنیزې نمرې ووېشل شي

۱۴۴۷/۷/۹

د کور او ښار جوړولو وزارت د محترم وزیر الحاج مولوي نجیب الله حیات حقاني اغېزمن مدیریت او د هڅو په پایله کې؛ راستانه شوو مهاجرو لپاره د سرپناه د وېش لړۍ پراخه شوه او دغه بهیر په ګړندیتوب روان دی.

محترم وزیر الحاج مولوي نجیب الله حیات حقاني، دغه چاره په داسې حال کې پراخوي چې تر دې وړاندې په پنځه نورو ولایتونو بلخ، کندز، لغمان، کندهار او بامیان کې دغه پروسه پیل شوې او لا هم روانه ده.

کندهار هغه ولایت دی چې تر دې دمه په کې 1515 اړمنو کورنیو ته نمرې وېشل شوې دي.

ورپسې کندز ولایت دی چې تر دې دمه په کې 500 اړمنو کورنیو ته د ایمي استوګنې په موخه استوګنیزې نمرې وېشل شوي دي.

بلخ ولایت کې دغه شمېر چې اړمنو مهاجرو کورنیو ته دې نمرې ورکړل شي تر 313 کورنیو رسېدلی او نور هم په تمه دي.

لغمان ولایت کې بیا 200 کورنیو عملاً د نمرې وېش ترسره شوی او لا دوام لري.

پر دې سربېره بامیان ولایت کې 70 کورنیو ته نمرې وېشل شوې دي او 30 اړمنو کورنیو ته کورونه هم وېشل شوې دي.

پکتیا او فراه بیا هغه ولایتونه دي چې د مستحقو کورنیو لپاره په کې د خیریه بنسټونو له لوري کورونه جوړېږي او د ابادۍ چارې یې تر نوي او څه باندې نوي سلنې رسېدلي دي.

فراه ولایت کې 108 کورونه جوړېږي او په پکتیا کې بیا دغه ارقام تر 100 کورونو دي.

لا هم د بېلا بېلو ادرسونو له لوري هڅې روانې دي چې څنګه کېدای شي په کور دننه اړمنو مهاجرو او بې سرپناه کورنیو ته د سرپناه زمینه برابره شي.

د یادونې وړ ده چې ټولې ښکېلې ادارې په بشپړې همغږۍ ، همکارۍ او ګډ لیدلوري سره کار کوي، څو دا بهیر په اغېزمنه او شفافه توګه مخ ته ولاړ شي.