د کابل ښار په څلورمه ناحیه کې د ودانیزو پروژو له روانو چارو څارنه ترسره شوه
1448/1/4
د ښاري تخلفاتو د مخنیوي او د ودانیزو پروژو د تطبیق د کنټرول عمومي ریاست اړوند د ښاري تخلفاتو د مخنیوي ریاست تخنیکي ټیمونو، د خپلو دوامداره څارنیزو فعالیتونو په لړ کې، د کابل ښار څلورمې ناحیې ته مراجعه وکړه او د شهید څلورلارې څخه د تایمني پروژې تر پنځم سړک پورې د یو شمېر ساختماني پروژو له چارو څخه ساحوي څارنه ترسره کړه.
د څارنې پر مهال هغه پروژې وکتل شوې چې د نافذه قوانینو، منظور شوو ښاري پلانونو او یا د ګاونډیانو د حریم د نقض احتمالي نښې په کې موجودې وې، چې له ډلې یې د غیرقانوني کړکیو او نورو ساختماني بدلونونو موضوعات هم شامل وو.
په دې لړ کې د هغو ودانیو ساختماني چارې ودرول شوې چې د نافذه مقرراتو خلاف یې فعالیت درلود.
همداراز له هغو مالکینو څخه چې د خپلو پروژو قانوني اسناد او جوازونه یې نه وو وړاندې کړي، غوښتنه وشوه چې خپل اسناد د ښاري تخلفاتو د مخنیوي ریاست ته وسپاري، ترڅو له دقیقې ارزونې وروسته، د هر ډول تخلف په صورت کې لازم قانوني اقدامات ترسره شي.
د یادې څارنې موخه د منظور شوو ښاري پلانونو سم تطبیق، د غیرمعیاري تراکم مخنیوی، د ښاري نظم ټینګښت، د ګاونډیانو د حقوقو او حریم ساتنه، د ساختماني کیفیت لوړول او د ښار د مدیریت ښهوالی دی.
