د راتلونکي مالي کال لپاره د وزارت پر اړتیاوو او وړاندیزونو خبرې وشوې
۱۴۴۷/۶/۲۲
د کور او ښار جوړولو وزارت محترم مالي او اداري مرستیال الحاج محمد ارسلاح خروټي، په خپل کاري دفتر کې د یو شمېر اړوندو ریاستونو سره د راتلونکي مالي کار پر اړتیاوو او وړاندیزونو خبرې وکړې.
ښاغلي مالي او اداري مرستیال وویل، هر ریاست دې د تېرو کلونو اشتباهات درک کړي او د راتلونکي لپاره دې یې تابیا ونیسي.
محترم محمد ارسلاح خروټي وویل، له ټولو هغه مواردو او اشتباهاتو دې ډډه وشي، چې په تدارکاتي او مالي برخو کې د خنډ او ځنډ لامل ګرځي.
نوموړي وویل، د بیت المال له ضایع کېدو دې مخنیوی وشي او هر ریاست دې د راتلونکي مالي کال لپاره خپلې اړتیاوې په دقیقه توګه په ګوته کړي او وړاندیز دې یې کړي.
هغه وویل، په راتلونکي کې دې په تدارکاتي پروسو کې د معادل جنس کلمه نه کارول کېږي او د معادل جنس له اخیستلو دې هم ډډه وشي.
ښاغلي مالي او اداري مرستیال الحاج محمد ارسلاح خروټي وویل، کله چې په قرارداد کې د معادل جنس کلمه وکارول شي، تر ډېره فساد، د وخت ضیاع او د بې کیفیته جنس راوړلو ته زمینه برابرېږي.
په غونډه کې، مالي ریاست هم د نوي مالي کال لپاره د بودیجې او د مصرف څرنګوالي په تړاو معلومات وړاندې کړل او د کره ارزونې غوښتنه یې وکړه.
موخه دا ده، چې څنګه کېدای شي بیت المال خوندي، اصل جنس ترلاسه او وخت کم مصرف شي.
