د کور او ښار جوړولو وزارت: اسلامي شریعت، اخلاص او د خلکو خدمت د اداري چارو بنسټ دی
۱۴۴۸/۲/۱
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ ، د دغه وزارت اداري ناسته ترسره شوه.
په یاده ناسته کې، د دغه وزارت د مسکن، ودانیزو چارو او د برنامو د پراختیا محترم معین الحاج مولوي ګل زرین صابر، د کور او ښار جوړولو وزارت محترم مالي او اداري معین مولوي محمد رباني ناصح او د دغه وزارت رئیسانو او چارسمبالو ګډون کړی وو.
په ناسته کې، د کور او ښار جوړولو وزارت محترم وزیر الحاج مولوي نجیب الله حیات حقاني، مسؤلینو ته لازمې لارښوونې وکړې چې په خپلو چارو کې اسلامي شریعت ته لومړیتوب ورکړي، نیتونه خالص وساتي او د دنیا تر څنګ د آخرت د سمون لپاره هڅه وکړي.
ښاغلي وزیر وویل، د ادارې په ټولو فعالیتونو کې اخلاص، صداقت، ژمنتیا او د وخت اغېزمن مدیریت باید په پام کې ونیول شي او له هر ډول بېځایه وخت ضایع کولو څخه ډډه وشي.
د وزارت مقام مسؤلینو ته سپارښتنه وکړه، چې له مراجعینو او خلکو سره ښه چلند وکړي، ورسپارل شوي مسؤلیتونه په سمه او مسلکي توګه ترسره کړي او د خپلو ماتحت کارکوونکو د اصلاح او لارښوونې لپاره جدي پاملرنه وکړي.
په ناسته کې دا هم وویل شول، چې د مسلمانانو د وخت درناوی دې وشي او د خدماتو وړاندې کولو بهیر دې په اغېزمن او منظم ډول پر مخ یووړل شي.
محترم وزیر الحاج مولوي نجیب الله حیات حقاني زیاته کړه، چې د عالیقدر امیرالمؤمنین حفظهالله د لارښوونو او پیغامونو د رسولو مسؤلیت یې ترسره کړ او له ټولو مسؤلینو څخه یې وغوښتل چې یادې سپارښتنې په بشپړ ډول عملي کړي.
د ناستې په پای کې د ادارې د چارو د لا ښه والي، د خدمتونو د کیفیت د لوړولو او د اسلامي او اداري ارزښتونو د پیاوړتیا په اړه لازمې سپارښتنې شریکې شوې.
